“FRETILIN-CNRT Konsidera MI Fraku”

 Timor Post
Kinta, 24 Fevereiru 2011
Dili-“Bancada FRETILIN no CNRT iha Parlamentu Nasional konsidera Ministeriu Infraestrutura (MI) laiha kapasidade atu dezenvolve area infraestrutura iha Timor Leste.

Pojisaun ne’e bancada FRETILIN no CNRT foti relasiona ho kondisaun Estrada iha teritoriu tomak ne’ebe kuaze at hotu ba kestaun ne’e komesa husi povu babain to’o reprejetante povu iha PN hakilar maibe lahatudu rejultadu pozitivu.

“Problema Estrada ne’e kausa lorloron ema preukupa i problema ne’e mosu tamba durante ne’e governu halo deit manutensaun ba Estrada nebe Indonesia husik hela ba ita,”haktuir Deputadu CNRT Arao Noe de Jesus iha PN kuarta (23/02).

Nia akresenta manutensaun ba Estrada ne’ebe durante ne’e iha barak liu laiha kualidade.

“Ne’e hotu tamba planeamentu no levantamentu maka ladun diak no kapasidade tekniku mos lasufisiente entaun rejultadu husi osan barak nebe gasta ne’e nia fit back ita lahare hetan,”lamenta deputadu CNRT ne’e.

Membru komisaun G ne’ebe trata asuntu infraestrutura no ekipamentu social ne’e hateten iha orsamentu foin lalais ne’e iha dotasaun inisial governu propoin U$20 Milloens maibe PN aumenta tan U$22 milloens ba fundu emerjensia atu salva guarda ba situasaun hotu.

Maibe deputadu CNRT ne’e hatete MI mak presija detekta no programa diak atu emerjensia hirak ne’e labele halo kalkulu depois halao servisu maibe invensaun mak barak liu entaun rejultadu servisu oituan maibe osan selu barak liu.

“Akompanyamentu terenu tekniku sira husi infraestrutura, obras publika tenki akompanya lorloron atu hatene kubikasi nebe estraga kada loron,”esplika Arao.

Tan ne’e deputadu CNRT ne’e dehan atu hadia iha fatin balu tenke emerjensia duni laos halo tiha projeitu ida mak konsidera hanesan emerjensia.

IHA FATIN HANESAN, Bancada FRETILIN liu husi deputadu Inacio Moreira hatete problema ne’e kontinua mosu tamba governu mak laiha kapasidade atu rejolve.

“problema Estrada ne’e tinan bain loron mak hanesan ne’e hela deit, tamba governu mak laiha duni kapasidade,”deklara nia.

Inacio dehan governu ne’e ukun tinan tolu ona no gasta osan barak ona maibe lahatudu rejultadu pozitivu.

Tan ne’e FRETILIN kontinua husu responsablidade governu nian tamba osan barak mak gasta ona liliu prosesu ejekusaun osan refere.

“Governu tenke asumi responsablidade esplika ba povu katak osan barak mak gasta ona maibe Estrada seidauk diak realidade iha dili laran deit kontinua at,”lamenta nia.

Buat hirak ne’e akontese tamba governu liliu MI laiha planu atu dezenvolve nasaun ne’e.(gus)