Projeto Proteksaun Mota Tono no Zona Agricola Tono iha 2011 bainhira mak komesa?

Ida ne'e maka Mota Tono, Mota ne'ebe kondisoens hahu husi tempu portuques no Indonesia nia tempu fahe Komunidade Oecusse parte Leste no  Weste.

Planu Orsamentu Jeral de estadu ba 2011 indika ona atu Harii Ponte Tono nee'be sei fornese mobilizasaun iha futuru.

Fundus ne'ebe indika iha Fundus Infrastruktura tuir Livru III Orsamentu Jeral Estadu ne'e sei aloka orsamentu hamutuk USD $ 500.000,00. hamutuk husi fundus infrastrukta ba estradas no Ponte Timor Laran tomak iha USD $ 15.485.000,00.

Perguntas tuir mai mak, Wainhira los maka Projeitu ne'e halao?

Hafoin OJE 2011 aprovadu iha Decembru 2010. fundus infrastruktura tuir lolos hahu dadauk ona ninia eksekusaun inklui iha Oecusse. Maski nune'e TOLAS se tenta nafatin buka informasaun Oinsa alokasaun fundus hirak ne'e sei eksekuta iha Distrito Oecusse.

Hanesan mos publika tiha ona iha TOLAS  iha 22 Fevereiru 2011 http://tolas-oekusse.blogspot.com/2011/02/orsamentu-hadian-estradas-oekusse-tun.html Fundus Infrastruka ba Tinan 2011 aloka ba Distrito Oecusse tun husi USD $ 10.710.000,00 ba deit USD $ 2.532.000,00 kuaje tun 76,36 %.

hare pigura iha karaik ne'e komparasaun entre orsamentu infrastruktura iha 2010 kompara ho iha 2011.

Pakote Projeitu desenvolvementu Distrito too oras ne'e sidauk iha mak Kompleto ou 100% sa tan atu tengki hahu ona eksekuta Projeitu iha 2011.

Keta   halo povu mak sei terus hela deit hodi sustenta aan hadia rasik sistema aat sira kada tinan, hanesan akontese iha Terminal Sentral Tono wainhira Mota konsege sobu rahun Bronjong kuaje metro 3. Uma kain hamutuk 46 ne’ebe hela besik liu ba area terminal ne'e kontribui rasik Osan kada uma kain USD $ 35.00,00 hodi sosa Bronjong no ense rasik hodi hari'i bronjong iha loron Sabadu 26 Fevereiru 2011.

Wainhira TOLAS konfirma ida ne’e ho Chefi Uma kain ida ne’ebe lakoi temi nia naran ekpresa ninia frustadu ida ne'e ba governu no lider sira:

“ Hare rasik ba, hare ba ami bele halo, salak governu ne’e ajdua sosa deit netik ami bronjong, kuitadu ami povu kiik ne'e mak atu hein too bainhira los mak lori  bronjong mai  tau ba ami nia mota ne’e”

 Haktuir tan husi chefi uma kain ne’e “ ami iha ne’e pronto atu kolabora ho governu salak iha programa ne’ebe klaru hodi husu ami tun hotu ba servisu, se ohin loron ami la halo rasik ami nia bronjong ne’e ohin kalan mota ne’e bele sobu hotu ami sira tuur iha Tono ne’e.

Wainhira TOLAS halo monitorizasaun ba servisu rasik ense bronjong ne'ebe uma kain 46 ne'e halao, latoo oras 4 nia laran sira konsege hari'i bronjong hodi proteje fila fali kanal kuak ne'ebe rahun no sobu husi mota kuaje metru 3 nian.servisu ne'e hahu iha tuku 14.00 oras meudia too tuku 17.00 lorokraik.
Maski udan la fo fatin, ikus mai bronjong metru 3 ne'e remata iha tempu ne'e kedas. ( Ana)