Fahe Projetu Liu Husi SMS “Oscar Lima: CCI-TL Konsidera Grave”

Deputado Inasio Moreira - Bankada FRETILIN

Jornal Nacional Diario - Kinta, 29 Setembru 2011

 

Comersio no Industria Timor Leste (CCI-TL) hakfodak tebes ho deklarasaun membru Parlamentu Nasional husi Bancada FRETILIN, Inacio Moreira, ne’ebe aprezenta iha Plenaria kona ba Politika fahe Projeitu liu husi Short Message Service (SMS).

Iha Lpenaria, Tersa-Feira Loron (27/9), deputadu Inacio aprezenta SMS husi emprezariu internasional (Indonesia) naran Wekdoyo ne’ebe lori Francisco Kalbuadi Lay nia naran haruka SMS ba Sekretariu Estadu Eletrisidade, Agua no Urbanizasaun (SEEAU), Januario Pereira dehan, sira hasoru malu ona ho Mr. Wong husi Kompanhia CNI (China Nuclear Industry) katak, Projetu eletrisidade Liquica, maliana, ho Suai pronto ona atu hala’o, hein deit Wekdoyo sira halo survei no hato’o proposta orsamentu.

Francisco Kalbuady Lay, nudar Prezidente Consellu Politika Nacional (CPN) no Conselu Dirasaun Nacional (CDN) Partidu CNRT, Kalbuady mos maun rasik husi Ministru Infra-estrutura Pedro Lay.

To’o horseik, seidauk hetan konfirmasaun husi Kalbuady kona ba nia naran ne’ebe sita iha SMS ne’e, tamba nia (Kalbuadi) sei halao vizita iha rai liur.

Vise Prezidente CCI-TL ba asuntu Infra-estrutura, Oscar Lima reforsa katak, tuir lolos aktu ida ne’e la bele akontese, sa tan, fahe projetu liu husi SMS deit, tamba ne’e, tenki iha investigasaun profundu hodi hetan lia los.

“Hau espera katak, Sekretariu Estadu Januario Pereira sei la monu ba tentasaun aat ne’e, tamba, projetu eletrisidade ne’e fo valor diak tebes ba veteranus sira,” hateten Oscar Lima ba Jornalista sira iha nia servisu fatin, Comoro, dili, Kuarta, loron (28/09).

Oscar hateten, projetu eletrisidade maioria parte veteranus sira mak hetan, inklui nia mos hetan hotu tanba ne’e, nia suzere atu halo estudu klean ba SMS hodi justifika lia los.

“Kuandu Bapa ida mak simu fali projetu eletricidade ne’e, hau hanoin diak liu fob a veteranus, tamba veteranus sira mos barak mak seidauk simu, problema veteranus iha Timor ne’e barak tebe-tebes, no hau espera katak buat ne’e la monu ba ema seluk maibe bele monu ba veteranus sira nia liman nafatin,” hateten Oscar Lima.

Diretor Monte Veado & Gunung Kijang ne’e realsa katak, nudar emprezariu Timor oan ema hotu iha diretu atu hetan projetu, maibe tenki liu husi jalur legal.

“Se ita fahe ba ema atus ida mak hetan projetu sira ne’e ba Timor oan, pelumenus uma atus ida mak iha Timor mak sei diak, se ema rihun ida, ema rihun ida ne’e mak sei hetan benefisiu, tamba ne’e hau hakarak hatete, labele fo benefisiu deit ba ema rai liur, hodi osan sira ne’e ba hotu rai liur,” afirma Oscar Lima.